Македонските произведители почнуваат со извозот на на месни и млечни производи на пазарот во Руската федерација
ПОБАРУВАЧКАТА ГОЛЕМА – НЕДОСТАСУВААТ КОЛИЧИНИ
Од овој месец Македонија ќе почне да извезува млечни и месни производи на рускиот пазар.
Македонска – руската стопанска комора активно учествуваше во целиот процес на отварање на големиот руски пазар за македонските месни и млечни производи.
– Го отворивме и рускиот пазар како стратегиски голем за нашите компании кои во текот на февруари треба да ги извезат првите количини млечни и месни производи, изјави Зоран Поповски, директорот на Агенцијата за храна и ветеринарство (АХВ).
Сите мерки кои ги презема Владата, додаде, се во насока на обезбедување поголемо производство. Македонија е позната по квалитетните производи, но во поглед на количините кои се бараат, особено на големите пазари, се уште се јавува проблем.
– Нашата цел е да им помогнеме на сите земјоделци да го зголемат своето производство. Така ќе можеме со количини да конкурираме, посебно на големите пазари. Максимално работиме на отворање на сите пазари кои досега беа затворени за нас. Веќе докажавме дека сме квалитетни, познати сме по квалитетни, безбедни производи согласно ЕУ стандардите, – подвлекува Поповски.
Македонија може да извезува млечни производи во САД. Се работи и на извоз на месни производи, на одобрување пласман на риба што наскоро се очекува, како и на извоз на производи од живинско месо во ЕУ. Според директорот на АХВ, ќе останат уште производите од свинско месо за кои, како што рече, во наредните години исто така ќе биде овозможен извоз на европскиот пазар, а оттаму и во сите други држави.
Во врска со здравствениот статус на животните и неговата следливост, Поповски е дециден дека системот на заштита функционира на највисоно ниво, согласно барањата на ЕУ.
– Македонија многу напредна во овој сегмент, но и натаму интезивно работиме за да бидат исполнети сите, и најмалите аспекти. Веќе и официјално, нашите живинарски фарми може да извезуваат во ЕУ, а одобрен е и извоз на млечни производи, говедско месо. Се надеваме на позитивен извештај во најбрз рок за извоз на производи од живина. Сето ова укажува дека контролата во делот на здравствената заштита е на високо ниво, а и контролата на прехранбените производи од животинско и неживотинско потекло се на највисоко ниво согласно ЕУ регулативите и стандардите, нагласиПоповски.
