Г-дин Сергеј Лавров во посета на Македонија

Во односите меѓу Руската Федерација и Република Мајкедонија воопшто не постојат отворени политички прашања. Наша задача е само да ја продолжиме соработката, порача шефот на руската дипломатија Сергеј Лавров по денешнатата средба во Охрид со неговиот домаќин министерот за надворешни работи Антонио Милошоски.
- Денешната средба е во насока на натамошно искористување на поврзаноста и тежнеењето за взаемна комуникација, која историски постои меѓу нашите земји за изградба на современи односи за развивање на соработката во духовно-култураната и во сферата на економијата и инвестициите, како што беше договорено на средбата на претседателите на Руската Федерација и на Македонија Медведев и Иванов минатата година во Санкт Петерсбург, рече Лавров.
Со министерот Милошоски се осврнале на тоа како се одвива исполнувањето на договореното од страна на претседателите на двете земји. Милошоски истакна дека двете земји споделуваат заеднички вредности, симпатии и културна блискост кои можат да послужат како капитал за надградување на македонско-руските односи како во политичка така и во економска сфера.
- Оваа посета може да биде значаен импулс за отворање на ново поглавје во насока на натамошно продлабочување на и онака добрите односи меѓу Македонија и Русија. Таа има современ, но и историски симболизам бидејќи денес се одбележува 150 - годишнината од првото руско дипломатско присуство на територијата на Република Македонија со отварањето на Рускиот конзулат во Битола пред 150 години, рече Милошоски. Министрите Лавров и Милошоски на средбата го потпишаа Заедничкиот план на министерставта на двете земји за редовни консултации за периодот 2011 - 2012 година за кои се очекува да придонесат за поблиска координација во различни области на надворешната политика.
Милошоски воедно, му се заблагодари на неговиот руски колега за гестот кој денешните средби ги искористи на Македонија да и достави неколку архивски документи од руската дипломатска архива значајни за историјата и посебноста на македонскиот народ.
Со Лавров во Охрид средби остварија и претседателот Ѓорге Иванов и премиерот Никола Груевски. Интензивирање на соработката меѓу Македонија и Русија, пред се, во делот на енергетиката, но и на економијата и политиката биле тема на разговор на премиерот Никола Груевски со рускиот министер за надворешни работи Сергеј Лавров.
Премиерот Груевски во изјава за медиумите по промоцијата на 14 нови наслови од Проектот за превод на 1.000 стручни и научни книги, оцени дека има позитивен тренд во односите меѓу двете земји, особено, вели, откако руската компанија „Газпром“ објави дека Македонија ќе биде вклучена во гасоводот „Јужен поток“.
- Во тек се процедури од кои може да очекуваме да се склучат и соодветни договори, рече Груевски.
Импулс на соработката, смета дал и Договорот меѓу Русија и Македонија за исплата на клириншкиот долг.
- Таа ќе биде спроведувана преку изведување работи во градежните зафати за изградба на гасната инфраструктура, односно за цевките за дистрибуција на гас во различни делови на Македонија, кои се надеваме дека ќе започнат кон крајот на оваа или почетокот на идната година, бидејќи во моментот се работи на проектите за кои се ангажирани меѓународни компании, нагласи Груевски.
Со рускиот министер за надворешни работи било разговарано и за склучување на договор за слободна трговија меѓу двете земји, а во завршна фаза, додаде тој, е и договорот за пријателство и соработка, којшто очекува да биде потпишан во втората половина од годинава.
Премиерот Груевски информира дека било разговарано и за можности за склучување договори од областите на културата, на труд и социјална политика, за соработка меѓу полициите во делот на сузбивање на трговијата со наркотици и за други договори кои ќе им помогнат на граѓаните од двете држави, но и на самите држави за подобра соработка.
Средбата ја оцени како позитивна и изрази надеж дека ќе резултира со конкретни резултати.
Прашан за тоа дали со рускиот министер разговарале за спорот со името, Груевски рече дека тоа не било тема на нивните разговори.
- Русија е една од првите држави во светот која не призна како Република Македонија под уставното име и тоа го почитува до ден денеска, изјави премиерот Никола Груевски.
Претседателот Иванов се сретна со рускиот министер за надворешни работи Лавров
Претседателот на Република Македонија Ѓорге Иванов денеска во Охрид имаше средба со министерот за надворешни работи на Руската Федерација Сергеј Лавров.
На средбата во Вилата „Билјана“, претседателот Иванов и министерот Лавров разменија мислења за нивото на односите на двете држави. Заедничка оценка на двајцата соговорници беше дека Република Македонија и Руската Федерација негуваат исклучително блиски и пријателски односи, кои се основа за натамошно продлабочување на соработката во економијата, енергетиката, културната и научната размена, туризмот.
Како што соопшти Кабинетот на претседателот Иванов, особено значаен дел од средбата беше посветен на перспективите кои се отвораат меѓу двете држави во поглед на планираното поврзување на Република Македонија на проектираниот гасовод Јужен Поток. Шефот на државата изрази уверување дека реализирањето на овој проект ќе овозможи значителен економски подем на Република Македонија, обезбедувајќи достапен и сигурен извор на енергенси.
Претседателот Иванов и Министерот Лавров разговараа за досегашните успешни руски инвестиции во Република Македонија и за можностите за натамошно инвестирање, како и за пристапот на македонските производители до рускиот пазар.
Иванов ја афирмираше поканата до рускиот претседател Дмитри Медведев да ја посети Република Македонија, при што ќе може на највисоко ниво да се потпише договорот за пријателство и соработка меѓу двете држави.
Искажувајќи голема благодарност за принципиелниот став на Руската Федерација во однос на почитувањето на уставното име на Република Македонија, чин кој особено се цени и од македонските граѓани, претседателот Иванов го запозна министерот Лавров со актуелностите во процесот на разговорите со Република Грција и за позициите на Република Македонија.

Престојното одржувaње на национален ден на универзитетот Ломоносов

На ден 19.04.2011 год. Во просториите на комората беше одржан состанок со претставникот на родители на деца кои студираат во Русија г-ѓа Петреска Жозефина. Целта на состанокот е престојното одржувaње на национален ден на универзитетот Ломоносов кој ќе се одржи на 6 Мај, на кој студентите од Македонија ќе ја претставуваат својата земја. Комората ќе ја подржи оваа акција со рекламен материјал, каталози и проспекти од компаниите.

Деловна средба на Македонско-руската стопанска комора

Македонија и Русија имаат реални можности за соработка. Македонските компании имаат огромни можности за бизнис зделки на пазарот од 140 милиони потрошувачи. Иако постојат потенцијали, сепак, размената ниту по обемот, ниту по структурата не е на задоволително ниво. Ова беше посочено на шеста деловна средба на Македонско-руската стопанска комора што се одржа на 29.03.2011г.во Скопје. - Русија е пазар од 140 милиони потрошувачи. Големината е импозантна - со тоа и можноста за бизнис зделки. Трговската размена е доминантен облик на економската соработка меѓу Македонија и Русија, а Руската Федерација континуирано е меѓу првите 10 трговски партнери на земјата, рече вицепремиерот и министер за финансии Зоран Ставрески обраќајќи се на средбата. Тој посочи дека македонската страна во размената бележи висок трговски дефицит при што покриеноста на увозот со извозот не надминува пет отсто, што пак се должи на увозот на енергенсите без кој надворешно-трговската размена би била балансирана. Според министерот Ставрески, за да се намали дефицитот потребно е да се искористат компаративните предности на македонските компании во однос на потребите на рускиот пазар. - Русија е голем потрошувач на лекови, а истовремено и голем пазар за пласман на прехранбените производи. Македонската економија, од друга страна, има добар потенцијал во делот на хемиската индустрија, во производството на лекови и препарати, како и во производството и преработката на земјоделско-прехранбените производи. За да се поттикнат овие гранки, државата е подготвена да им помогне на фирмите за воспоставување соработка да формира дистрибутивни центри во Руската Федерација за македонските земјоделско-прехранбени производи, како и да помогне во нивната промоција преку саемски манифестации, изложби и слично, истакна министерот Ставрески. Тој информира дека во интерес на подобрување на конкурентноста на македонските производи на рускиот пазар, македонска Влада на последната седница на меѓувладината македонско-руска комисија ја афирмирала и инцијативата за потпишување договор за слободна трговија, што ќе придонесе без трошоци значително да се подобри позицијата на македонските производи на рускиот пазар. Министерот смета дека во интерес на унапредување на соработката е да се воспостават и стратегии за развој на транспортот, како и воспоставување директна авионска линија. Соработката во градежништвото, рече министерот Ставрески, бележи негативен тренд како последица на двојното оданочување на градежните работи кои се изведуваат подолго од 12 месеци, но и поради непризнавањето на банкарските гаранции од македонските деловни банки, што е неопходно при склучување инвестициски договори за настап на рускиот градежен пазар. За полесен пристап на компаниите од Македонија и Русија на двата пазари се разгледува и можноста за прифатливи билатерални инструменти на меѓудржавно ниво со карактер на бартер-аранжмани, а за да се одбегне двојното оданочување, како што рече министерот Ставрески, ќе се покрене иницијатива за измена на спогодбата меѓу Владата на Република Македонија и Руската Федерација. Тој посочи дека се потребни позначајни поместувања во секторот енергетика, во кој иако има поместувања со потпишување на Договорот за подмирување на клириншкиот долг. - Најавата за влез на руската компанија „Гаспром“, за реализирање на проектот „Гасификација на Република Македонија“ е исто така од особено значење за нашата земја. Соработката со рускиот гигант отвора повеќе можности меѓу кои и вклучување на Македонија во гасоводот „Јужен тек“, истакна министерот за финансии, додавајќи дека ова е значајно за Македонија и стопанството бидејќи освен што ќе се најде на мапата на европските енергетски крстосници, ќе се добие и евтин енергенс преку кој ќе се зајакне конкурентноста на македонската економија и ќе влијае позитивно врз економскиот развој. Од 1997 до 2008 година во Македонија се влезени 1,3 милијарди евра инвестиции од Руската Федерација. Сепак, министерот Ставрески истакна дека Македонија може да им понуди многу повеќе на руските инвеститори. Производство на автомобилски компоненти, информатичко-комуникациска технологија, земјоделство и инфраструктура, се стратешки сектори кои може да ги искористат инвеститорите од Русија за да го оплодат својот капитал, рече министерот Ставрески. Ваквите средби, како денешната, тој истакна дека не се само свечени сали и кристални чаши, туку се одлична можност да се види каде се наоѓаат постоечките бизнис релации и каде треба да одат во иднина. - Досегашната соработка е добра основа од која може да се тргне натаму. Постојат сите услови и двете страни да извлечат максимален бенефит од економските релации. Дополнително со долгогодишното пријателство меѓу Македонија и Русија шансите за успех при реализација на проектите се огромни, истакна министерот Зоран Ставрески. Амбасадорот на Руската Федерација Олег Николаевич Шчебрак, обраќајќи се пред присутните, рече дека двете страни ќе ги искористат потенцијалите за во 2012 година да се достигне размена од 1 милијарда долари. - Во насока на ваквата оптимистичка прогноза зборува и зголемената активност на македонскиот пазар од страна на крупните руски компании, рече амбасадорот при тоа набројувајќи ги инвестиции од 35 милиони долари на „Лукоил“, 50 милиони инвестиции од „Солвеј“ во рудниците Саса и Бучим, потоа 166 милиони евра инвестиции на „Синтез груп“ во изградбата на ТЕ-ТО, како и проектот што за реконструкција и модернизација на трите блока на РЕК битола што го работи „Силви машини“. Според него важна задача што треба да се направи меѓу двете земји е да се поправи огромниот трговски дебаланс, кој создава тежок дефицит за македонскта економија, како и диверзификација на рускиот извоз во македонија, структура која за жал во моментот повеќе од 90 отсто се однесува на јаглеродно енергенси. Тој истакна дека Руската Федерација е заинтересирана за изградба на гасоводниот систем во Македонија, во што е вклучено и порамнувањето на клириншкиот долг - се надеваме дека наскоро околу прашањата за реализација на првата фаза на проектот за гасификација ќе почнат и двостраните консултации. Сметаме дека и во однос на проектот за приклучување на Македонија кон „Јужен тек“ уште годинава двете страни се должни да најдат конкретно решение. Главен фактор, смета амбасадорот, за решавање на овие две важни задачи мора да биде остварување и развој на директни деловни врски меѓу бизнис заедниците на двете земји, како на федерално, така и на регионално ниво, притоа обезбедувајќи ефективна размена на информации за руските компании заинтересирани за работа на македонскиот пазар, исто така и на македонските компании подготвени за работа на рускиот пазар. - Не треба да се потценува солидниот потенцијал на руските региони, особено на оние кои се објективно заинтересирани за испорака на своето производство во вашата земја и оние кои се заинтересирани за увоз на македонските земјоделски производи. Амбасадата заедно со Македонско-руската стопанска комора веќе работи во таа насока и наскоро очекуваме во Скопје да пристигне бизнис делегација на Стопанската комора на Вологда, рече рускиот амбасадор во земјава. Тој смета дека силен и конкретен импулс на економската соработка ќе даде одржување нова седница на меѓувладината комисија до крајот на годинава во Македонија. Претседателот на Руско-македонската стопанска комора Ѓорѓи Дика, истакнувајќи дека постојат потенцијали за зголемување на соработката меѓу двете земји, рече дека рускиот пазар е заинтересиран за земјоделските производи и пијалоците. - Руските региони се вистински потенцијал за развој на економијата, рече Дика додавајќи дека постои интерес за прехранбените производи и пијалоците. Тој посочи дека 65 отсто од прехранбените производи на рускиот пазар се од увоз и оти тука може да се најдат македонските производи. Дика го посочи и проблемот што се јавува на рускиот пазар со македонски производи кои го губат идентитетот дека се од Македонија бидејќи се увезуваат во Русија преку други земји. Според него, поттик ќе даде и отворање канцеларија за лобирање кај потенцијалните руски партнери за создавање мешовити компании. - Русија може да биде вистински стратешки партнер на Македонија, истакна претседателот на Комората.

Русија двојно ќе го зголеми извозот на нафта во Јапонија

Русија оваа година двојно ќе го зголеми извозот на нафта во Јапонија на 18 милиони тони, за да и помогне на земјата во обновата по разорниот земјотрес и цунамито, изјави рускиот заменик-премиер Игор Сечин. Сечин додаде дека јапонските компании можат да се придружат на рускиот енергетски гигант „Газпром“ во истражување на две големи наоѓалишта на гас, вклучувајќи го полето „Ковикта“ кое содржи резерви од 2 билиона кубни метри гас.

Надворешнотрговскиот суфицит на Русија е намален

Надворешнотрговскиот суфицит на Русија во јануари е намален за 10 отсто во споредба со истиот период лани, на 16,3 милијарди долари. - Остварено е позитивно надворешно-трговско салдо во висина од 16,3 милијарди долари, што е 1,8 милијарди помалку од јануари 2010 година, соопшти руската Федерална царинска служба.

Средба со декан на Меѓународниот Славјански универзитет

На ден 10.03.2011 год. Во Свети Николе беше одржана средба со г-дин Јордан Ѓорчев - декан на Меѓународниот Славјански универзитет. Целта на посетата беше подготовка на заеднички настап на конференцијата за научно - економска соработка која се одржува идниот месец во Свети Николе. На истата ќе гостуваат гости од Руска Федерација.

Деловна средба со зам. министер за Земјоделие

На ден 09.03.2011 год. Се одржа средба помеѓу директорот на Комората г-дин Бешлиев, и економскиот советник во Амбасадата на РФ во РМ г-дин Лесин со заменикот министер за Земјоделие водостопанство и шумарство г-дин Перица Ивановски. Средбата е по повод најавеното учество на компании од Република Македонија на саемот МИР ПИТАНИЕ 2011 во Москва. Оваа година во организација на учеството ќе биде вклучено и министерството согласно заклучоците од седницата на меѓувладината комисија одржана во Декември 2010 година во Москва.

Средба со раководството на САСА

На ден 02.03.2011 год. Се одржа средба со г-дин Максим Прохоров од компанијата САСА Македонска Каменица. Целта на средбата беше зачленување на компанијата САСА во Македонска Руска СтопанскаКомора и понатамошно нејзино активно учество во работата на Комората.

Работна средба со РУЕН

На ден 01.03.2011 год Се одржа работна средба со претставниците на компанијата РУЕН –Кочани. На средбата се разговараше за постигнатите резултати на Руен односно потпишаните договри за соработка со КАМАЗ и ЛАДА.

Работна средба со директор на РУЕН

На ден 08.03.2011 год Се одржа работна средба со г-дин Оливие Далонгвил извршниот директор на РУЕН Кочани. Разговорите беа водени како резултат за добиената можност за евентуалната соработка на нашата членка РУЕН со АВТО ВАЗ од Тољати и потпишувањето на договор со КАМАЗ за испорака на уреди за менувач ламели и корпи. Улогата на Комората е во обезбедувањето на потребни документи за стандардизација на производите по руските прописи.